Xilli ay sii kordhayso hadal-haynta ku saabsan isku-socodka xorta ah ee qaaradda Afrika, dhowr waddan ayaa qaaday tillaabooyin geesinnimo leh oo meesha ka saaraya caqabadaha dhanka safarka ee hortaagnaa dadka u dhashay qaaraddan.
Tillaabadan oo canbaarta ka reebaysa nidaamyadii hore ee adkaa, ayaa albaabada u furaysa weji cusub oo ku saabsan is-dhexgalka iyo koboca dhaqaalaha qaaradda.
Haddaba, shabakadda Goobjoog ayaa halkan ku eegeysa isbaddalkan cusub iyo sida ay muwaadiniinta Soomaaliyeed uga faa’iideysan karaan fursadahan is-daba-joogga ah.
Wadamada Furay Xuduudahooda iyo Sababta Ka Dambaysa
Dowladda Togo ayaa dhowaan ku dhawaaqday go’aan taariikhi ah oo dhaqan-galay, kaas oo dhigaya in muwaadiniinta u dhashay dhammaan wadamada xubnaha ka ah Midowga Afrika (AU) ay dalkaas ku tegi karaan fiisa-la’aan (Visa-Free), iyagoo joogi kara muddo gaaraysa illaa 30 maalmood.
Togo ma aha dalka keliya ee qaaday dhabbahan; waxaa jirtay waddamo dhowr ah oo horay u qaatay go’aamo la mid ah kuwaas oo muwaadiniinta Afrikaanka ah u oggolaanaya isku-socod xor ah, waxaana ka mid ah:
Rwanda
Ghana
Benin
Gambia
Seychelles
Ujeeddada ugu weyn ee ka dambaysa go’aamadan ay wadamada Afrikaanka ahi u furayaan xuduudahooda ayaa ah inay kor u qaadaan ganacsiga, dalxiiska, maalgashiga, iyo is-dhaafsiga hiddaha iyo dhaqanka, iyadoo isla markaana la xoojinayo xiriirka iyo isku-duubnida ka dhaxeysa wadamada qaaradda.
Is-barbardhigga: Afrika oo Furmeysa iyo Reer Galbeedka oo Sii Adkaanaya
Xilli ay qaaradda Afrika ku dhiirranayso inay d dhexdeeda is u furto, waxaa xusid mudan in wadamada Reer Galbeedka ay sii adkaynayaan xannibaadaha dhanka socdaalka ee ay ku soo rogayaan qaaradda Afrika. Tusaale ahaan, dalka Mareykanka, maamulka Trump ayaa xannibaado baaxad leh iyo mamnuucis dhan kasta ah ku soo rogay in ka badan laba darsin oo wadamada Afrika ah.
Isbaddalkan is-ka-soo-horjeeda ayaa muujinaya in Afrika ay hadda u weecanayso dhanka is-ku-tashiga iyo dhisidda suuq dhexdeeda ah.
Muxuu Xukunkan iyo Isbaddalkaan u Yahay Muwaadiniinta Soomaaliyeed?
Su’aasha ugu weyn ee ay isweydiinayaan dad badan oo Soomaaliyeed ayaa ah Ma ka faa’iideysan doonaan muwaadiniinta ku safraya baasaboorka Soomaaliga fursaddan fiisa-la’aanta ah?
Maadaama go’aanka dowladda Togo (iyo wadamada kale ee la midka ah ee qaatay siyaasaddan) uu si cad u sheegayo in fursaddan ay u furan tahay dhammaan muwaadiniinta wadamada xubnaha ka ah Midowga Afrika, dalka Soomaaliyana uu yahay xubin muhiim ah oo ka tirsan Midowga Afrika, sharcigan wuxuu si toos ah u khuseeyaa muwaadinka Soomaaliyeed.
Fursadaha Ganacsiga iyo Maalgashiga
Ganacsatada Soomaaliyeed ee caanka ku ah hal-abuurka iyo dhiirrananta ayaa hadda heli kara suuqyo cusub oo ku yaalla Galbeedka iyo Bartamaha Afrika iyagoon u baahnayn habraacyadii adkaa ee fiisaha. Tani waxay u sahlaysaa inay si fudud u furaan xafiisyo ganacsi, una dhoofiyaan ama kala soo baxi karaan badeecooyin wadamadaas.
Waxbarashada iyo Tababarrada
Ardayda iyo aqoonyahannada Soomaaliyeed ayaa heli kara fursad ay ku tagaan wadamada sida Rwanda iyo Ghana oo leh jaamacado iyo xarumo tababar oo tayo leh, iyagoo ka faa’iideysanaya isku-socodka fudud si ay kor ugu qaadaan aqoontooda.
Ka Gudbista Caqabadda Baasaboorka
Baasaboorka Soomaaliga ah ayaa muddo dheer wajahayey xannibaado dhanka safarka ah oo caalami ah. Tillaabooyinkan ay qaadayaan wadamada Afrikaanka ah waxay neef weyn u yihiin muwaadiniinta Soomaaliyeed, iyagoo tusaya in qaaraddoodu ay u fureyso albaabo u oggolaanaya inay si sharaf leh u safraan.
Isbaddalka ka socda qaaradda Afrika ee ku aaddan fiisa-la’aanta waa fursad taariikhi ah oo ay tahay in dowladda iyo shacabka Soomaaliyeed ay ka faa’iideystaan.
Xilli ay wadamada reer galbeedku sii xirayaan xuduudahooda, albaabada cusub ee ka furmay Togo, Rwanda, Ghana, iyo wadamada kale waxay muujinayaan in mustaqbalka maalgashiga iyo is-dhexgalka uu hadda yaallo gudaha qaaradda Afrika.