Ciidamada ilaalada madaxtooyada Mareykanka ayaa toogasho ku dilay nin hubeysan oo rasaas ku furay goob amni oo ku taalla meel ka baxsan xarunta Aqalka Cad.
Sida ay sheegeen saraakiisha amniga, dhacdadu waxay bilaabatay wax yar ka hor 6:00 fiidnimo waqtiga Bariga Mareykanka, markii nin uu soo dhowaaday goobta baaritaanka amniga ee ku dhow Aqalka Cad isla markaana uu rasaas ku furay ciidamada halkaas ku sugnaa.
Ciidamada ayaa si degdeg ah uga jawaabay weerarka, iyagoo rasaas ku celiyay kuna dhuftay weeraryahanka, kaas oo markii dambe ku geeriyooday isbitaalka.
Mas’uuliyiintu waxay xaqiijiyeen in qof rayid ah uu sidoo kale ku dhaawacmay israsaaseynta, inkastoo aan weli la caddeyn in dhaawacaasi uu ka dhashay rasaastii uu furay weeraryahanka ama rasaastii ay ciidamada amniga jawaabta u adeegsadeen, balse Xaaladda qofka dhaawacmay ayaa lagu sheegay mid halis ah.
Ciidamada amniga ayaa sheegay in aysan jirin wax dhaawac ah oo soo gaaray saraakiishooda, isla markaana Madaxweynaha Mareykanka, Donald Trump, uu ku sugnaa Aqalka Cad xilliga weerarku dhacayay, isagoo aan waxyeello soo gaarin.
Wararka hordhaca ah ayaa tilmaamaya in ninka la dilay lagu magacaabi jiray Nasire Best, 21 jir ah, kaas oo horey dhowr jeer ula kulmay ciidamada Secret Service kadib isku dayo uu ku doonayay inuu ugu dhowaado xarunta Aqalka Cad.
Ilo amni ayaa sheegay inuu horey u qabay dhibaatooyin dhinaca caafimaadka dhimirka ah, isla markaana lagu amray inuu ka fogaado xarunta madaxtooyada.
Si kastaba ha ahaatee dhacdadan ayaan ahayn weerarkii koobaad ee muddooyinkii dambe lagu qaado uu ku sugnaa Trump, ayadoo Todobaadyo ka hor rasaas lagu furay goob ay casho sharaf uga qeyb-galayeen asaga iyo madax kale.