Masiibo xooggan ayaa ka dhacday ismaamulka Nakuru ee dalka Kenya, ka dib markii ugu yaraan 16 arday ay ku dhintaan, halka 74 kale ay ku dhaawacmeen dab weyn oo xalay saqdii dhexe qabsaday dhismaha jiifka ee dugsiga sare ee gabdhaha ee Utumishi Girls Academy oo ku yaalla magaalada Gilgil.
Sida ay xaqiijiyeen laamaha amniga iyo ururka La-tshalka Cas ee Kenya, dabka ayaa dhashay abaaro 1:00 ilaa 2:00 ee habeenimo, xilli ay ardaydu hurdayeen, wuxuuna si degdeg ah u qabsaday dhismaha jiifka oo loo yaqaanno Meline Waithera Block, kaasi oo ay degganaayeen 220 arday oo isugu jira fasallada 10-aad, Form 3, iyo Form 4.
Taliyaha Booliska Gobolka, Samuel Ndanyi, iyo Saraakiil ka tirsan Dambi-baarista (DCI) oo gaaray goobta ayaa xaqiijiyay tirada rasmiga ah ee dhimashada, iyagoo sheegay inay weli wadaan baaritaanno lagu ogaanayo sababta rasmiga ah ee keentay dabka.
Dadaallada gurmadka iyo deminta dabka ayaa waxaa iska kaashaday ciidamada dab-demiska ee Naivasha, Ciidanka Difaaca Kenya (KDF), Ururka La-tshalka Cas, iyo shaqaalaha adeegga qaranka ee NYS, kuwaasi oo ku guuleystay inay xakameeyaan masiibada ka dib saacado dhowr ah oo ay ololka la tacaalayeen.
74-ta arday ee ku dhaawacantay dhacdadan, kuwaasi oo qaba gubasho iyo dhaawacyo kala duwan qaba, ayaa loola cararay isbitaalka weyn ee Gilgil iyo isbitaalka St. Joseph si loogu fidiyo daryeel caafimaad oo degdeg ah.
Dhanka kale, ururka La-tshalka Cas ayaa dugsiga ka dhex furay xarun bixisa gargaarka dhanka nafsadda si loo caawiyo ardayda, waalidiinta, iyo macallimiinta ka naxay masiibadan.
Madaxda ugu sarreysa dalka Kenya, oo ay ka mid yihiin Madaxweyne William Ruto, iyo mas’uuliyiin kale oo dhanka waxbarashada ah ayaa si xanuun leh uga tacsiyeeyay geerida ardaydan, iyadoo masiibadan ay dib u xasuusinayso masiibooyinkii hore ee caynkaan oo kale ahaa ee ragaadiyay dugsiyada dalka Kenya.
Goobjoog News