Garsooraha caanka ah ee Cumar Cabdulqaadir Cartan, ayaa markii ugu horreysay si rasmi ah uga hadlay go’aankii dhowaan loogu diiday inuu galo dalka Mareykanka, kaas oo sababay inuu ka haro dhexdhexaandinta kulammada Koobka Adduunka 2026.
Sida ku xusidda war qoraal ah oo ay baahisay jariiradda caanka ah ee “Globo Esporte” ee dalka Baraasiil, garsoore Cartan ayaa muujiyay deganaan iyo bisayl weyn, isagoo sheegay in inkastoo xaaladdu ay adkayd, haddana uu diiradda si buuxda u saarayo mustaqbalka iyo tartammada soo socda ee waayahiisa ciyaareed.
Warka qoraalka ah ee uu soo saaray garsooraha, kaas oo ay si gaar ah u heshay majallada ciyaaraha ee Globo Esporte, ayaa u qornaa sidaan:
“In kasta oo ay jiraan duruufahan adag, haddana niyaddaydu waa ay sarraysaa, waxaanan si buuxda xoogga u saarayaa caqabadaha iyo tartammada igu soo fool leh mustaqbalka waayahayga garsoornimo. Waxaan rabaa inaan u mahadceliyo xiriirrada FIFA iyo CAF taageeradii weynayd ee ay ii fidiyeen, waxaanan ballan-qaadayaa inaan sii dhawro, korna u qaado heerkayga garsoore, anigoo diiradda saaraya mustaqbalka.”
Cumar Cartan, oo dhowaan loo aqoonsaday garsooraha ugu fiican qaaradda Afrika, ayaa Mowqifkiisa ku muujiyay in go’aanka dhibka badnaa ee Mareykanka uusan marnaba niyad-jabin doonin himilooyinkiisa ciyaareed, isagoo ballan-qaaday inuu sii wadi doono horumarinta naftisa si uu mar kale magaca Soomaaliya kor ugu qaado fagaarayaasha caalamiga ah.