Hay’adda UK ee Kormeerka Hawlgallada Ganacsiga Badda (UKMTO) ayaa sheegtay inay heshay warbixin ku saabsan dhacdo amni oo ka dhacday qiyaastii 50 mayl-badeed dhinaca koonfur-bari kaga beegan magaalada Al-Shihr ee dalka Yemen.
Sida ay hay’addu sheegtay, doon ay saarnaayeen rag hubeysan ayaa u soo dhowaatay markab ganacsi, iyadoo ay muuqatay inay isku dayayeen inay fuulaan markabkaasi.
Faahfaahinta dhacdada weli si buuxda looma shaacin, balse UKMTO ayaa sheegtay in markabku uu sii watay safarkiisa kuna wajahanyahay dekeddii uu ku socday ka dib markii ay dhacdadani dhacday.
Mas’uuliyiinta badda ayaa la soconaya xaaladda, waxaana maraakiibta ku sugan gobolka lagu wargeliyay inay muujiyaan feejignaan dheeraad ah maadaama ay weli jiraan khataro amni oo saameyn kara isu socodka ganacsiga badda ee gobolka.