Washington iyo Tehran ayaa saxiixay heshiis is-afgarad (MoU) ah oo lagu doonayo in lagu soo afjaro xiisaddii iyo colaaddii u dhexeysay labada dal, iyadoo heshiiska uu dhigayo in si degdeg ah loo joojiyo hawlgallada militari isla markaana la bilaabo wadahadallo rasmi ah oo soconaya 60 maalmood.
Qodobada ugu muhiimsan ee heshiiska waxaa kamid ah:
In labada dhinac ay joojiyaan dhammaan hawlgallada militari.
In si tartiib tartiib ah loo furo marinka muhiimka ah ee Strait of Hormuz, oo ah marin ay maraan shidaalka iyo ganacsiga caalamiga ah.
In Mareykanku bilaabo qaadista xayiraadaha badda ee saarnaa Iiraan.
In labada dhinac ay galaan wadaxaajood ku saabsan barnaamijka nukliyeerka ee Iiraan iyo qaadista cunaqabateynta dhaqaale.
Sidoo kale, heshiiska ayaa xusaya in Iiraan ay mar kale xaqiijisay inaysan sameysan doonin hub nukliyeer ah, halka Mareykankuna uu ballanqaaday inuu fududeyn doono qaar kamid ah ganacsiga shidaalka iyo helitaanka hantida Iiraan ee hore loo xayiray.
Ururka Caalamiga ah ee Maraakiibta (IMO) ayaa soo dhaweeyay heshiiska, isagoo sheegay in uu muhiim u yahay dib u soo celinta amniga maraakiibta iyo xorriyadda isu socodka badda ee marinka Hormuz.