Qaramada Midoobay ayaa bilowday hawlgal lagu daadgureynayo in ka badan 11,000 badmaax oo muddo bilo ah ku xanibnaa marin-biyoodka istiraatiijiga ah ee Hormuz, kaddib heshiiskii dhexmaray Mareykanka iyo Iiraan ee lagu soo afjaray dagaalkii u dhexeeyay Mareykanka, Israa’iil iyo Iiraan.
Xoghayaha Guud ee Hay’adda Caalamiga ah ee Maraakiibta (IMO), Arsenio Dominguez, ayaa sheegay in hawlgalkan lagu fulinayo iskaashi dhow oo lala yeelanayo Iiraan, Cumaan, dowladaha kale ee xeebaha gobolka, Mareykanka iyo shirkadaha maraakiibta.
Marin-biyoodka Hormuz ayaa si weyn u xirmay tan iyo markii dagaalku billowday 28-kii Febraayo 2026, taas oo sababtay in boqolaal maraakiib ah ay ku xayirmaan halkaasi.
Si kastaba, dhaq-dhaqaaqa maraakiibta ayaa sare u kacay toddobaadkii la soo dhaafay kaddib saxiixa heshiiska nabadeed, iyadoo ugu yaraan 36 markab oo ganacsi ay hal maalin gudaheed ka gudbeen marinkaasi.
Wasaaradda Difaaca Cumaan ayaa sheegtay in daadgureynta loo fulin doono si tartiib ah si looga fogaado isku-dhacyo iyo khataraha amni ee weli ka jira deegaanka.
Dhanka kale, Denmark ayaa ku dhawaaqday inay ku biireyso howlgal badeed caalami ah oo ay hoggaaminayaan Faransiiska iyo Britain, kaas oo lagu taageerayo dib u furista marin-biyoodka Hormuz oo muhiim u ah ganacsiga caalamka.
Wariyeyaal ku sugan Hormuz ayaa sheegay in wada-hadallada u dhexeeya Mareykanka iyo Iiraan ay sameynayaan horumar muuqda, iyadoo labada dhinac ee Iiraan iyo Cumaan ay ka wada hadlayaan hababka dib loogu furayo isu-socodka ganacsiga ee marinkaasi.
Si kastaba ha ahaatee, weli waxaa jira caqabado siyaasadeed, iyadoo Xoghayaha Arrimaha Dibadda Mareykanka Marco Rubio uu sheegay in Iiraan aan loo oggolaan doonin inay canshuur ama lacag marin ah ka qaaddo maraakiibta isticmaala biyaha caalamiga ah ee Hormuz.
Marin-biyoodka Hormuz ayaa ka mid ah waddooyinka ugu muhiimsan ee maraakiibta shidaalka iyo ganacsiga dunidu maraan, waxaana xaaladdiisa si dhow ula socda suuqyada iyo dowladaha caalamka.