Sacuudiga iyo 13 dal oo kale ayaa ku dhawaaqay sameynta Isbahaysi Difaaca Badda oo Caalami ah, kaas oo diiradda saaraya ilaalinta maraakiibta ganacsiga iyo waddooyinka muhiimka u ah gaadiidka badeecadaha iyo tamarta.
Isbahaysigan ayaa qorsheynaya inuu xoojiyo amniga maraakiibta mara Bab al-Mandab, Badda Cas iyo Gacanka Cadmeed—marinnada isku xira Badweynta Hindiya iyo Badda Mediterranean-ka.
Dalalka lagu sheegay inay ku biireen waxaa ka mid ah Soomaaliya, Jabuuti, Masar, Yemen, Suudaan, Pakistan, Turkiga, Qatar, Bahrain, Kuwait, Urdun, Bangladesh iyo Comoros, iyadoo Sacuudigu noqonayo xubin aasaase ah isla markaana martigelinaya xarunta isbahaysiga.
Isbahaysigu wuxuu sheegay in iskaashigiisu uu ku salaysnaan doono wadaagista xogta sirdoonka, isku-dubaridka hawlgallada, qorsheynta howlgallada iyo tababbarro ciidan oo wadajir ah.
Sacuudigu wuxuu sheegay in isbahaysigu yahay mid difaac ahaan uun u dhisan oo aan lagu bartilmaameedsanayn dal gaar ah.
Soomaaliya oo qayb ka noqotay qorshaha
Ka mid noqoshada Soomaaliya ayaa muhiimad gaar ah yeelan karta, maadaama Soomaaliya ay ku taallo xeebta dheer ee Gacanka Cadmeed iyo Badweynta Hindiya, halkaas oo maraakiibta caalamiga ahi ay ku maraan waddo ganacsi oo muhiim ah.
Bab al-Mandab ayaa ah marin aad u cidhiidhi ah oo isku xira Gacanka Cadmeed iyo Badda Cas. Qiyaastii 10 ilaa 12 boqolkiiba ganacsiga badda ee dunida ayaa mara aaggaas, sida lagu sheegay warbixinta Al Jazeera.
Tallaabadan ayaa ku soo beegmaysa xilli ay sii kordhayaan khataraha ka dhanka ah maraakiibta ganacsiga ee gobolka, gaar ahaan weerarrada ay Xuutiyiintu ku qaadaan maraakiibta ku sugan Badda Cas.
Isbahaysiga cusub ayaa sidoo kale albaabka u furay dalal kale oo doonaya inay ku biiraan, kadib marka ay dhammaystiraan habraacyadooda gudaha.
Soomaaliya, oo leh xeebta ugu dheer qaaradda Afrika, ayaa sidaas ku biirtay dadaal caalami ah oo lagu doonayo in lagu ilaaliyo mid ka mid ah marinnada badeed ee ugu muhiimsan dunida.