Ergayga Mareykanka Jared Kushner ayaa sheegay in maamulka Madaxweyne Donald Trump uusan oggolaan doonin dib-u-dhiska Marinka Gaza ilaa Xamaas ay hubkeeda dhigto, xilli dadaallada Mareykanka ee lagu soo afjarayo dagaalka Gaza ay weli wajahayaan caqabado.
Kushner, oo ah wiilka uu soddogga u yahay Madaxweyne Trump, ayaa Isniintii kulan la yeeshay Ra’iisul Wasaaraha Israa’iil Benjamin Netanyahu.
Kulankaasi, sida ay sheegtay warbaahinta, ma uusan keenin horumar muuqda oo ku saabsan hirgelinta qorshe Gaza ah oo Xamaas ay horey ugu heshiisay.
Kushner ayaa sheegay in Washington ay hayso qorshe dib loogu dhisayo Gaza, balse uu ku xirnaan doono marka hore hub-ka-dhigista Xamaas.
Wuxuu sidoo kale sheegay in Mareykanku uusan xaddidi doonin waxa uu ku tilmaamay “xaqa Israa’iil u leedahay inay is-difaacdo” haddii ay jiraan khataro degdeg ah.
Hadalladan ayaa muujinaya in maamulka Trump uu xoogga saarayo in Gaza laga hirgeliyo qorshe amni oo ku xiran hub-ka-dhigista Xamaas.
Dhanka kale, Xamaas ayaa qayb ka ahayd hannaan Mareykanku taageerayo oo ay ku jiraan hub-ka-dhigis, ka bixitaanka ciidamada Israa’iil iyo joojinta weerarrada ka socda Gaza.
Madaxweyne Donald Trump ayaa isaguna Isniintii ku baaqay in la joojiyo weerarrada Israa’iil ka fulinayso Gaza, isagoo sheegay in Xamaas ay oggolaatay inay hubka dhigto.
Kushner ayaa sidoo kale sheegay inuu Axaddii kulan la yeeshay masuuliyiin ka tirsan Xamaas, kaas oo ahaa kulan dhif ah oo ka dhacay xilli Washington ay dadaal ugu jirto in la soo afjaro colaadda.
weerarrada Israa’iil ee Gaza ayaa tan iyo markii lagu dhawaaqay xabbad-joojinta sanadkii hore lagu dilay ugu yaraan 1,265 qof, halka tirada guud ee dhimashada Falastiiniyiinta tan iyo Oktoobar 2023 ay gaartay 73,399 qof, sida lagu sheegay xogta ay warbixintu xustay.
Hadalka Kushner ayaa kusoo beegmaya iyadoo mustaqbalka Gaza uu weli ku xiran yahay arrimo waaweyn oo ay ka mid yihiin hub-ka-dhigista Xamaas, ka bixitaanka ciidamada Israa’iil, amniga Gaza iyo qorshaha dib-u-dhiska dhulka ay dagaalladu si weyn u burburiyeen.