Dagaallo culus oo dib uga qarxay Yemen ayaa sababay barakaca ugu yaraan 46,000 qof tan iyo toddobaadkii hore, iyadoo Hay’adda Caalamiga ah ee Socdaalka ee Qaramada Midoobay (IOM) ay sheegtay in tirada dadka guryahooda ka cararaya ay saacad kasta sii kordhayso.
Dagaallada ayaa si gaar ah uga sii xoogaystay xeebaha galbeed ee Yemen, oo ay ku jiraan gobollada Taiz iyo Al-Hudaydah, iyadoo ciidamada Xukuumadda Yemen iyo Xuutiyiinta ay ku dagaallamayaan dhowr jiho.
IOM waxay hore u sheegtay in in ka badan 18,500 qof ay barakaceen 72 saacadood gudahood, iyadoo xaaladdu si degdeg ah uga sii dartay.
Xiisadda ayaa sii xoogeysatay kadib markii Xuutiyiintu ay qabsadeen magaalada dekedda ah ee Mocha, taas oo ku dhow marinka muhiimka ah ee Bab al-Mandab. Wararka ayaa sidoo kale sheegaya in Xuutiyiintu ay gaareen jasiiradda Mayun/Perim, taasoo ku taalla gudaha marinka Bab al-Mandab.
Bab al-Mandab ayaa ah marin muhiim u ah ganacsiga caalamiga ah, waxaana xaaladda ka taagan Yemen ay dhalisay walaac laga qabo in dagaalladu saameeyaan maraakiibta ganacsiga, sahayda shidaalka iyo qiimaha tamarta adduunka.
Sacuudi Carabiya ayaa iyaduna qaaday duqeymo ka dhan ah goobaha Xuutiyiintu gacanta ku hayaan, iyadoo wararku sheegayaan in duqeymo lagu qaaday garoonka diyaaradaha ee Mocha kadib markii Xuutiyiintu la wareegeen magaalada. Xuutiyiintuna waxay sii wadeen weerarro ay ku qaadayaan bartilmaameedyo gudaha Sacuudiga ah.
Hay’adaha Qaramada Midoobay ayaa ka digaya in dagaallada cusub ay sii xumeeyaan xaaladda bani’aadantinimo ee Yemen, halka qoysas badan oo barakacay ay gaareen goobo aysan ka jirin hoy, cunto iyo amni ku filan.
IOM waxay sheegtay in qaar badan oo ka mid ah dadka hadda barakacaya ay horey dhowr jeer uga carareen guryahooda sababo la xiriira colaadda.
Dagaalladan cusub ayaa sidoo kale halis gelinaya xabbad-joojintii muddada dheer jirtay, iyadoo colaadda Yemen ay u muuqato inay mar kale ku sii jeeddo weji dagaal oo ballaaran, taasoo khatar ku ah shacabka iyo amniga marin-biyoodka Bab al-Mandab.