Wasiirrada arrimaha dibadda ee dalalka Khaliijka iyo wasiirka arrimaha dibadda Iiraan ayaa la filayaa inay ku kulmaan magaalada Salalah ee Cumaan, iyadoo diiradda lagu saarayo sidii loo heli lahaa heshiis ku-meel-gaar ah oo lagu maareeyo maraakiibta ganacsi ee mara Marinka Hormuz.
Kulankan ayaa qayb ka ah dadaal diblomaasiyadeed oo ay hormuud ka yihiin Cumaan iyo Iiraan, kuwaas oo lagu doonaya in lagu dejiyo xaaladda ka taagan marin-biyoodkan istiraatiijiga ah, kaas oo muhiim u ah ganacsiga iyo tamarta caalamka.
Sida warbixinnadu sheegayaan, qorshaha laga wada hadlayo wuxuu dhigayaa in maraakiibta soo galaysa Gacanka ay isticmaalaan marin ku yaalla biyaha Iiraan, halka maraakiibta ka baxaysa ay inta badan isticmaali doonaan dhanka biyaha Cumaan.
Ujeeddadu waa in la abuuro waddo ku-meel-gaar ah oo u saamaxda maraakiibta ganacsiga inay si ammaan ah uga gudbaan Hormuz.
Arrintan ayaa muhiimad gaar ah leh, maadaama isu-socodka maraakiibta ee Hormuz uu aad hoos ugu dhacay. Xog cusub ayaa muujinaysa in 7 markab oo keliya ay marinka ka gudbeen 10-kii Sebtembar, halka ka hor dagaalka ay halkaas mari jireen qiyaastii 125 markab oo ganacsi maalintii. Marinku sidoo kale wuxuu caadi ahaan qaadi jiray ku dhowaad 20% sahayda caalamka ee saliidda iyo LNG-ga.
Cumaan ayaa muddo toddobaadyo ah dhex-dhexaadin ka waday Tehran iyo dhinacyada kale, ayadoo dabayaaqadii Agoosto, Cumaan iyo Iiraan ay ku heshiiyeen qaab-dhismeed ku-meel-gaar ah oo ay ku jiraan marin maraakiibta loogu talagalay iyo qorshe lagu nadiifinayo miinooyinka badda, iyadoo sidoo kale la qorsheynayo wadahadallo lagu dhisayo nidaam waara oo lagu maareeyo isu-socodka Hormuz.
Si kastaba, heshiiska weli ma ahan xal kama dambeys ah, waxayna Iiraan weli ku xireysaa dib-u-furitaanka buuxa ee marinka arrimo ay ka mid yihiin xayiraadaha iyo cadaadiska Mareykanka, taas oo ka dhigaysa kulanka wasiirrada Khaliijka iyo Iran mid xasaasi ah oo laga filayo in lagu raadiyo tanaasul labada dhinac ah.