Mursal Isa oo ka tirsan xisbiga Miljöpartiet (MP) ayaa wajahaya fursad uu ku noqon karo xildhibaan ka tirsan Baarlamaanka Sweden, kaddib markii xisbigiisu dib u helay hal kursi oo ka tirsan gobolka Dalarna.
Mursal Isa oo ka soo jeeda magaalada Borlänge ayaa ku jira kaalinta koowaad ee liiska musharraxiinta xisbiga, taas oo ka dhigaysa qofka hadda ugu dhow kursiga.
Hase yeeshee, natiijada kama dambaysta ah waxaa go’aamin kara codadka qofka ee doorashada, iyadoo musharraxa labaad ee liiska, Maj Ardesjö oo ka soo jeeda Falun, ay sidoo kale leedahay fursad ay kaga horreyso.
Isa ayaa sheegay in xaaladdu ay tahay mid aan weli la hubin, isla markaana uu sugayo natiijada codadka qofka.
Miljöpartiet ayaa doorashadan ka sameeyay horumar guud ahaan Dalarna.
Xisbiga ayaa dib ugu soo laabtay golaha gobolka, kaddib markii uu ka maqnaa tan iyo doorashadii 2022, waxaana sidoo kale uu kuraas ka helay golayaasha degmooyinka Avesta, Mora iyo Säter.
Mursal Isa ayaa sheegay in arrimaha tamarta iyo fahamka sii kordhaya ee bulshada ee ku saabsan isbeddelka tamarta ay ka mid yihiin arrimaha uu aaminsan yahay inay gacan ka geysteen kororka taageerada xisbiga.