Madaxweynaha Masar, CabdiFataax Al-Sisi, ayaa sheegay in dalkiisu si buuxda u taageerayo dadaallada lagu xoojinayo amniga iyo xasilloonida Soomaaliya, isla markaana uu diiddan yahay tallaabo kasta oo wax u dhimaysa madax-bannaanida, midnimada iyo wadajirka dhuleed ee Soomaaliya.
Al-Sisi ayaa hadalkan sheegay intii uu kulan la yeeshay Agaasimaha CIA-da Mareykanka, John Ratcliffe, oo booqasho ku joogay Qaahira. Kulanka waxaa sidoo kale ka qeyb galay madaxa Sirdoonka Guud ee Masar, Hassan Rashad.
Labada dhinac ayaa kulanka kaga hadlay xiriirka istiraatiijiga ah ee Masar iyo Mareykanka iyo xaaladaha amni iyo siyaasadeed ee gobolka, oo ay ka mid yihiin dagaalka Iran, qorshaha xabbad-joojinta Gaza, arrinta Falastiin iyo colaadda Sudan.
Sida lagu sheegay warbixinta, Ratcliffe ayaa uga mahadceliyay Masar doorkeeda ku aaddan taageerada amniga iyo xasilloonida Afrika, isagoo carrabka ku adkeeyay muhiimadda ay leedahay in labada dal ay sii wadaan iskaashiga ku saabsan xaaladda Sudan, Soomaaliya iyo Geeska Afrika, iyo sidoo kale amniga maraakiibta caalamiga ah.
Hadalkan Al-Sisi ayaa kusoo beegmaya xilli Masar iyo Soomaaliya ay si weyn u xoojinayaan xiriirkooda siyaasadeed iyo midka difaaca, xilli
Labada dal ay xiriirkooda sare ugu qaadeen heer iskaashi istiraatiiji ah intii lagu jiray booqashadii Madaxweyne Xasan Sheekh Maxamuud uu Qaahira ku tagay bishii Janaayo 2025.
Tan iyo xilligaas, waxaa labada dhinac dhex maray heshiisyo la xiriira difaaca iyo iskaashiga milateri, ayadoo Masar ay sidoo kale sheegtay inay ciidamo ku biirin doonto Howlgalka Midowga Afrika ee Taageerada iyo Xasilinta Soomaaliya (AUSSOM), iyadoo wasiirka arrimaha dibadda Masar Badr Abdelatty uu hore u sheegay in ciidamo Masri ah la geyn doono gobolka Shabeellaha Dhexe.
Iskaashiga labada dal kuma koobna dhinacyada amniga iyo difaaca oo keliya, balse waxaa sidoo kale lagu ballaariyay garsoorka, ganacsiga iyo arrimaha la xiriira kheyraadka biyaha.
Warbixintu waxay xustay in ganacsiga Soomaaliya iyo Masar uu kordhay 88 boqolkiiba, isagoo gaaray qiyaastii 59 milyan oo dollar lixdii bilood ee hore ee 2024, marka loo eego 31 milyan oo dollar isla muddadaas sannadkii ka horreeyay.
Kulanka Al-Sisi iyo agaasimaha CIA-da ayaa kusoo beegmaya iyadoo Geeska Afrika iyo Badda Cas ay yihiin goobo ay ku loollamayaan dano amni, siyaasadeed iyo dhaqaale oo kala duwan.
Masar waxay muddooyinkii dambe si dhow ula shaqaynaysay Soomaaliya, iyadoo xiriirka Qaahira iyo Muqdisho uu sidoo kale ku xiran yahay khilaafka Masar iyo Itoobiya ee ku saabsan Biyo-xireenka Wabiga Niil (GERD).
Dhanka kale, Mareykanka iyo Masar ayaa dan wadaag ah ka leh amniga Badda Cas iyo marinka Bab al-Mandab, oo muhiim u ah isu-socodka ganacsiga iyo maraakiibta caalamiga ah.
Hadalkan cusub ee Madaxweyne Al-Sisi ayaa muujinaya in madax-bannaanida iyo wadajirka dhuleed ee Soomaaliya ay ka mid yihiin arrimaha uu Qaahira si cad uga hadlaysay marka ay la macaamilayso dhinacyada caalamiga ah, xilli xiriirka Soomaaliya iyo Masar uu sii xoogeysanayo.