Guddoonka cusub ee Golaha Wakiillada Galmudug ayaa maanta si rasmi ah xilka ula wareegay, munaasabad ka dhacday xarunta Golaha ee magaalada Dhuusamareeb.
Munaasabadda xil-wareejinta oo qabsoontay 19-ka Oktoobar 2026 ayaa waxaa ka qeyb galay xildhibaano ka tirsan Baarlamaanka Federaalka Soomaaliya, mudanayaasha Golaha Wakiillada Galmudug, wasiirro ka tirsan dowladda Galmudug, maamulka iyo hawlwadeennada Baarlamaanka iyo marti-sharaf kale.
Guddoomiyaha cusub ee Golaha Wakiillada Galmudug, Xuseen Maxamed Nuur, ayaa u mahadceliyay guddoonkii hore ee Golaha, isaga oo ku ammaanay shaqadii iyo dadaalkii ay qabteen muddadii ay xilka hayeen.
Waxa uu sidoo kale mahadnaq u jeediyay masuuliyiintii iyo marti-sharaftii ka soo qeyb gashay munaasabadda xil-wareejinta.
Guddoomiyaha cusub ayaa carrabka ku adkeeyay muhiimadda ay leedahay sii wadidda howlaha Golaha, xoojinta wada-shaqeynta iyo gudashada waajibaadka dastuuriga ah ee Golaha Wakiillada Galmudug.
Xil-wareejintan ayaa timid kaddib markii la doortay guddoon cusub oo hoggaamin doona Golaha Wakiillada Galmudug, kaas oo mas’uul ka noqon doona hagidda howlaha sharci-dejinta iyo gudashada waajibaadka Golaha.