In ka badan 137 milyan oo doollar ayaa lagu kharashgareeyay xayeysiisyada siyaasadeed ee adeegsada sirdoonka macmalka ah (AI) intii lagu jiray ololaha doorashooyinka dhexe ee Mareykanka ee 2026, taasoo muujinaysa sida tiknoolajiyaddan ay ugu sii fideyso ololayaasha siyaasadeed iyo tartanka doorashada.
Warbixin ay soo saartay hay’adda cilmi-baarista Wesleyan Media Project ayaa lagu sheegay in la aqoonsaday 220 xayeysiis siyaasadeed oo adeegsaday AI, kuwaas oo laga baahiyey 34 gobol oo Mareykanka ah.
Xayeysiisyadaasi waxay ka koobnaayeen muuqaallo, sawirro iyo codad la sameeyay ama wax laga beddelay iyadoo la adeegsanayo tiknoolajiyadda sirdoonka macmalka ah.
Warbixintu waxay sidoo kale muujisay in xayeysiisyadaas intooda badan aan si cad loogu sheegin daawadayaasha in AI la adeegsaday, iyadoo boqolkiiba 27 oo keliya ay lahaayeen calaamad muujinaysa adeegsiga tiknoolajiyaddaas.
Arrintan ayaa dhalisay walaac ku saabsan hufnaanta ololayaasha siyaasadeed iyo awoodda codbixiyeyaasha ay ku kala saari karaan muuqaallada dhabta ah iyo kuwa la farsameeyay.
Marka la eego cidda maalgelisay xayeysiisyada, xogta warbixinta ayaa tilmaantay in musharraxiinta iyo kooxaha taageera Jamhuuriyiinta ay ku lug lahaayeen qaybta ugu badan ee xayeysiisyada AI lagu aqoonsaday.
Waxaa la sheegay in kooxahaas ay maalgelinayeen 81 boqolkiiba xayeysiisyada la diiwaangeliyey, halka dhinaca Dimuqraaddiyiintu ay lahaayeen 12 boqolkiiba, inta soo hartayna ay ku jireen kooxo kale.
Adeegsiga AI ee siyaasadda ayaa sii kordhinaya doodaha ku saabsan saameynta tiknoolajiyaddu ku yeelan karto doorashooyinka, gaar ahaan marka la sameeyo muuqaallo ama codad been-abuur ah oo u muuqda kuwo dhab ah.