Addis Ababa – Midowga Afrika (AU) ayaa soo dhoweeyay qaraar ay Golaha Guud ee Qaramada Midoobay ansixiyeen, kaas oo dhiirrigelinaya in khariidadaha dunida laga isticmaalo hab muujinaya cabbirka dhabta ah ee qaaradaha, gaar ahaan Afrika.
Qaraarkan ayaa lagu boorrinayaa in si tartiib tartiib ah looga guuro Mercator Projection, oo ah habka khariidadaha dunida sida weyn loogu isticmaalo, loona wareego Equal Earth Projection, kaas oo si ka sax ah u muujinaya baaxadda dhabta ah ee dhulka iyo qaaradaha.
Guddoomiyaha Guddiga Midowga Afrika, Maxamuud Cali Yuusuf, ayaa sheegay in go’aankani yahay tallaabo muhiim ah oo lagu saxayo qaabka dunida loogu sawiro khariidadaha.
Habka Mercator-ka, oo markii ugu horreysay la sameeyay qarnigii 16-aad si loogu adeegsado hagidda maraakiibta, ayaa lagu dhaliilaa inuu si weyn u qalloociyo cabbirrada qaaradaha, gaar ahaan kuwa ka fog dhulbaraha. Arrintan ayaa sababtay in Afrika ay khariidadaha qaar uga muuqato mid aad uga yar cabbirkeeda dhabta ah.
Qaraarka cusub, oo loo yaqaan “Correct the Map”, ayaa Golaha Guud ee Qaramada Midoobay ku ansixiyay 164 cod oo oggol ah, hal dal oo diiday iyo lix dal oo ka aamusay.
Midowga Afrika ayaa sheegay in tallaabadani aysan ku koobnayn oo keliya sawiridda khariidadaha, balse ay muhiim u tahay in Afrika lagu matalo xaqiiqadeeda dhabta ah iyo baaxaddeeda saxda ah.
Waxaa sidoo kale lagu boorriyay hay’adaha caalamiga ah, nidaamyada waxbarashada, daabacayaasha iyo baraha dijitaalka ah inay si tartiib ah u adeegsadaan khariidado si cadaalad iyo saxnaan leh u muujinaya cabbirka dhabta ah ee qaaradaha.