𝐑𝐚’𝐢𝐢𝐬𝐮𝐥 𝐖𝐚𝐬𝐚𝐚𝐫𝐞 𝐗𝐚𝐦𝐬𝐚 𝐨𝐨 𝐤𝐚 𝐪𝐞𝐲𝐛𝐠𝐚𝐥𝐚𝐲 𝐒𝐡𝐢𝐫𝐤𝐚 𝐃𝐡𝐚𝐦𝐞𝐲𝐬𝐭𝐢𝐫𝐤𝐚 𝐇𝐞𝐬𝐡𝐢𝐢𝐬 𝐁𝐮𝐥𝐬𝐡𝐨 𝐨𝐨 𝐝𝐞𝐠𝐦𝐨𝐨𝐲𝐢𝐧𝐤𝐚 𝐁𝐚𝐥𝐚𝐧𝐛𝐚𝐥𝐥𝐞 𝐢𝐲𝐨 𝐆𝐮𝐫𝐢𝐜𝐞𝐞𝐥

Balanballe, Isniin 5 Oktoobar, 2026 : Ra’iisul Wasaaraha Xukuumadda Federaalka Soomaaliya Mudane Xamsa Cabdi Barre ayaa maanta safar ku tagay degmadda Balanballe ee Galmudug, waxaana halkaas si diirran ugu soo dhoweeyay Madaxweynaha Galmudug, Taliyaha Hay’adda Nabad Sugidda iyo Sirdoonka Qaran, Musharaxa Hoggaamiyaha Galmudug, maamulka degmada Balanballe , iyo qeybaha kala duwan ee deegaankan ku dhaqan.

Ra’iisul Wasaare Xamsa ayaa goobjoog ka noqday heshiis taariikhi ah oo ay wada gaareen beelaha walaalaha ah ee degmooyinka Balanballe iyo Guriceel, kadib colaado sanado badan qaatay.

Xaflad balaaran oo ay kasoo qeybgaleen bulshada labada degmo, odayaasha dhaqanka, waxgaradka iyo dhallinyarada , goobjoogna ka ahaayeen Ra’iisul Wasaare Xamsa , Madaxweynaha Galmudug, wasiirro iyo xildhibaanno heer federaal ah ayay labada ugaas ee beelahan , ee kala ah Ugaas Maxamed Ugaas Kayse iyo Ugaas Xasan Ugaas Xasan meel fagaaro ah ku saxiixeen heshiis 8 qodob ka kooban oo gebi ahaanba lagu soo afmeeray colaaddii jirtay.

Ra’iisul Wasaare Xamsa oo ka hadlay madasha ayaa yiri “Gogoshan waxaa iiga muuqata in labada dhinac ay ka go’antahay in ay si dhab wh u heshiiyaan, Illaahayna wuxuu ballanqaaday in uu idin waafajinayo, haddii cid ku xad-gudubto heahiiskana waxaad ku heshiiseen in aad ku xallisaan Shareecada Islaamka”. Waxa uu intaasi ku daray in sida heshiiska ku cad qofkii qof kale dillo in lagu fuliyo qisaas.

Ra’iisul Wasaare Xamsa oo hadalkiisa sii watay ayaa si weyn u bogaadiyay heshiiska la gaaray , kaas oo uu ku tilmaamay in uu yahay mid waafaqsan qorshaha xukuumadda ee Soomaali Heshiis ah, wuxuuna sheegay in heshiiskan uu horseedi doono nabad waarta, horumar dhaqaale iyo in shacabka si wanaagsan loo gaarsiiyo adeegyada dowladda maadaamaa ay colaaddii dhammaatay.

Ra’iisul Wasaare Xamsa ayaa intii uu ku sugnaa degmada Balanballe waxa uu dhagax-dhigay iskuul ay dhigan doonaan carruurihii ku agoontoobay colaadihii beelaha dhex-maray, waxa kale oo uu Ra’iisul Wasaaraha dhagax-dhigay Aqalka Nabadda, iyo garoonka ciyaaraha Balanballe.

Mudane Xamsa Cabdi Barre waxa uu dhanka kale tababar usoo xirey cutub ka tirsan ciidanka Nabadda Sugidda kuwaas oo ku biiraya ciidanka amniga dalka .