Baydhabo: Ra’isul Wasaare Kheyre Oo Ka Jawaabaya Dilkii Ka Dhacay Magaalada

Kulan iminka uga socda Baydhabo odeyaasha dhaqanka ee Koonfur galbeed iyo ra’isul wasaaraha xukuumadda federaalka ah ayaa la sheegayaa in looga hadlayo arrimo ay ka mid yihiin dil ka dhacay Baydhabo bishii December ee sanadkii hore.

Ilo ku dhow shirkan ayaa Goobjoog News u xaqiijiyey in shacabka su’aalo badan ka qabaan wixii dhacay December, taasi oo ay odeyaasha u qaadeen kulanka ra’isul wasaaraha.

Shirkan oo saxaafadda loo diiday ayaa lagu waramayaa in sidoo kale looga hadli-doono xoojinta dhaqanka iyo arrimaha guud ahaan koonfur galbeed.

Lama oga sida uu ra’isul wasaare Xasan Kheyre uga jawaabayo, laakin xukuumadiisa ilaa hadda raaligelin iyo magdhow kama bixin dilka 15 qof oo rayid ah iyo sidoo kale dhaawaca laba qof oo kale oo dhacay 13-kii ilaa 15-kii bishii Dicember ee aynu ka soo gudubnay.

December, Wakiilka gaarka ah ee Xoghayaha Guud ee Qaramada Midoobay u qaabilsan Soomaaliya, Nicholas Haysom, ayaa dowladda federaalka ka dalbaday in ay sharraxaad ka bixiso wixii ka dhacay magaalada Baydhabo ee xarunta maamulka Koonfur Galbeed laga soo billaabo 13-kii ilaa 15-kii bishii December kadib markii  ciidamo Soomaali ah oo ay taageerto Qaramada Midoobay ay ku lug lahaayeen xarigga Sheekh Mukhtaar Roobow Abuu Mansuur.

Warqadda waxa kale oo ku jirtay xarigga 300 oo qof oo kale oo la sheegay in ay ku lug lahaayeen dibadbaxyo ka dhashay xarigga Sheekh Mukhtaar Roobow oo qaarkood la sheegay in xabsiga lagu hayay wax ka badan 48 saac balse markii dambe la sii daayay intii u dhaxaysay Diseembar 18 ilaa 22.

Goobjoog News