VIENNA, Austria – Mas’uuliyiinta sare ee Qaramada Midoobay ayaa ku baaqay in la xoojiyo iskaashiga caalamiga ah iyo nidaamyada caddaaladda si wax looga qabto dambiyada sii kobcaya ee caalamka ka jira, kuwaas oo si joogto ah isu beddelaya una adeegsanaya farsamooyin cusub.
Shirkii 35-aad ee Guddiga Ka Hortagga Dambiyada iyo Caddaaladda Dambiyada ee Qaramada Midoobay (CCPCJ) oo Isniintii ka furmay magaalada Vienna ayaa diiradda lagu saaray halisaha amni ee ka dhashay dambiyada abaabulan, musuqmaasuqa, dambiyada internet-ka iyo argagixisada.
Agaasimaha Fulinta ee Xafiiska Qaramada Midoobay ee Daroogada iyo Dambiyada (UNODC), Monica Juma, ayaa sheegtay in kooxaha dambiyada abaabulan ay si joogto ah ula qabsanayaan xaaladaha cusub, taasoo adkeyneysa dadaallada lagu xakameynayo.
Dhanka kale, Guddoomiyaha Golaha Dhaqaalaha iyo Arrimaha Bulshada ee Qaramada Midoobay, Lok Bahadur Thapa, ayaa carrabka ku adkeeyay in la dagaallanka dambiyada abaabulan, musuqmaasuqa, dambiyada internet-ka iyo argagixisada ay muhiim u tahay horumar waara iyo xaqiijinta yoolalka horumarineed ee Qaramada Midoobay.
Inta uu socdo shirka oo socon doona illaa 5-ta Juun, wufuudda ka qeybgaleysa ayaa ka doodi doona saddex qaraar oo muhiim ah kuwaas oo la xiriira ka hortagga ku takri-falka carruurta ee internet-ka, la dagaallanka ka ganacsiga dadka si loogu qasbo dambiyo, iyo xoojinta tallaabooyinka lagu ciribtirayo khiyaanooyinka maaliyadeed.
Qaramada Midoobay ayaa sheegtay in dambiyada maanta ay noqdeen kuwo si weyn ugu tiirsan tiknoolajiyadda, kana gudba xuduudaha dalalka, taasoo keentay baahi loo qabo iskaashi caalami ah iyo habab cusub oo lagu ilaaliyo dhibbanayaasha laguna horumariyo cadaaladda.