Waxgarad, odayaal dhaqameed iyo siyaasiyiin ka tirsan beesha Xawaadle ayaa kulan ballaaran oo ay ku yeesheen Beledweyne kaga dalbaday in la hakiyo howlaha doorashada HirShabeelle, waxayna sheegeen in hakinta loo baahan yahay inta xal siyaasadeed laga gaarayo tabashooyinka ka jira gobolka Hiiraan.
Ka qayb-galayaasha kulanka ayaa ku dooday in hannaanka doorashada ee hadda socda uusan si buuxda uga tarjumin rabitaanka bulshada deegaanka.
Waxay ku baaqeen hannaan ku dhisan caddaalad, matalaad dhab ah iyo awood-qaybsi ay ku qanci karaan dhammaan dhinacyada wadaaga maamulka HirShabeelle.
Dhanka kale, IGAD ayaa madaxda Dowladda Federaalka, dowlad-goboleedyada iyo saamileyda siyaasadda Soomaaliya ugu baaqday wada-hadal qaran oo loo dhan yahay.
Baaqa ururka wuxuu khuseeyaa xaaladda siyaasadeed iyo doorashooyinka Soomaaliya guud ahaan, mana ahayn hindise si gaar ah loogu dhex-dhexaadinayo muranka HirShabeelle.
Baaqa waxgaradka Xawaadle ayaa imaanaya xilli dhowaan ururka JSP uu shaaciyay in madaxweyne Cali Guudlaawe uu yahay murashaxooda doorashada Hirshabeelle, islamarkaana siyaasiyiinta iyo waxgaradka Hiiraan ay arrintaas ka biya diideen.