Dowladda Mareykanka ayaa ka qaaday cunaqabateyntii saarnayd Ciidamada Difaaca Eritrea iyo hay’ado kale oo Eritrean ah, tallaabadan ayaana loo arko mid wax ka beddeli karta xiriirka Washington iyo Asmara, xilli Mareykanka iyo beesha caalamku ay si gaar ah isha ugu hayaan amniga iyo maraakiibta ganacsiga ee Badda Cas.
Wasaaradda Maaliyadda Mareykanka ayaa 18-kii Sebtembar 2026 ku dhawaaqday in hay’adihii Eritrea ee lagu bartilmaameedsaday cunaqabateynta la xiriirtay dagaalkii Tigray laga saaray nidaamka cunaqabateynta Mareykanka.
Waxaa ka mid ahaa Ciidamada Difaaca Eritrea iyo People’s Front for Democracy and Justice (PFDJ), oo ah xisbiga talada haya dalka.
Cunaqabateyntaas waxaa lagu soo rogay 2021-kii xilligii madaxweynihii hore ee Mareykanka Joe Biden, iyadoo Washington ay ku salaysay doorka ciidamada Eritrea ee dagaalkii Tigray ee waqooyiga Itoobiya.
Xilligaas, Wasaaradda Maaliyadda Mareykanka waxay ciidamada Eritrea ku eedaysay inay ku lug lahaayeen falal ay ka mid yihiin dilka dad rayid ah, boob, tacaddiyo galmo iyo xannibaadda gargaarka bani’aadamnimo.
Go’aanka cusub ayaa imanaya xilli Badda Cas ay noqotay meel muhiim ah oo dhinaca amniga iyo ganacsiga caalamiga ah ah, gaar ahaan kadib markii xiisadaha Bariga Dhexe ay saameeyeen isu-socodka maraakiibta ganacsiga iyo tamarta.
Eritrea waxay leedahay xeeb dheer oo ku taalla Badda Cas, waxayna ku dhowdahay mid ka mid ah marinnada muhiimka ah ee isku xira Badweynta Hindiya iyo Badda Mediterranean-ka.
falanqeeyayaasha ayaa tallaabadan u arka mid suuragal ka dhigi karta in Mareykanka iyo Eritrea ay yeeshaan xiriir istiraatiiji ah oo dhow, iyadoo Washington ay sii kordhinayso danaha ay ka leedahay amniga Badda Cas.