Wararka laga helayo magaalada Baydhabo ee xarunta gobolka Baay ayaa sheegaya in saacadihii hore ee saaka ay magaalada iyo qaar ka mid ah xaafadaha ku dhow ay ka dhaceen iska horimaadyo u dhexeeya ciidamada dawladda iyo maleeshiyaad ka amar qaata maamulkii hore ee Koonfur Galbeed.
Wararka hordhaca ah ee laga helayo deegaanka ayaa tilmaamaya in rasaas iyo dagaal laga maqlay qaybo ka mid ah magaalada, iyadoo xaaladda amni ay weli tahay mid aan si buuxda loo kala caddeyn.
Ilaa hadda ma jiraan xog rasmi ah oo si madax-bannaan u xaqiijinaysa khasaaraha ka dhashay iska horimaadyada ama baaxadda uu dagaalku gaaray.
Xiisadda ayaa la xiriirta khilaafka siyaasadeed iyo amni ee muddooyinkii u dambeeyay ka jiray Koonfur Galbeed, gaar ahaan magaalada Baydhabo, halkaas oo ay dhawr ku dagaalameen ciidamada dowladda Federaalka ah iyo xoogag taabacsan madaxweynihii hore ee Koonfur Galbeed, Cabdicasiis Xasan Maxamed Laftagareen.