Wasaaradda Maaliyadda oo Soo Saartay Xeer Lacago Looga Qaadaayo Maxkamadaha iyo Qareennada
Sheeko:Dalka
![](https://goobjoog.s3.eu-central-1.amazonaws.com/content/uploads/2023/03/27074332/xeer.jpg)
Wasaaradda Maaliyadda oo kaashaneysa hoggaanka Hey’addaha Garsoorka ayaa xeer ka soo saartay Ajuurada (Lacagaha) laga qaadaayo adeegyada Maxkamaddaha iyo Khidmada Diiwangelinta Qareennada, kaas oo qeyb ka noqonaya canshuuraha wasaaradda ay ka qaadeyso Maxkamadaha.
Kaddib kulan wadashiti ah oo ay yeesheen Wasiirka Maaliyadda,Guddoomiyaha Maxkamadda Sare, Guddoomiyaha Maxkamadda Gobolka Banaadir iyo Guddoomiyaha Maxkamadda Racfaanka, iyo Ururka Qareennada, ayaa waxaa ay Wasaaradda Maaliyadda Xukuumadda Federaalka Soomaaliya ay Xeer-nidaamiye ka soo saartay Ajuurada (Lacagaha) laga qaadaayo adeegyada garsoor oo ay bixiyaan Maxkamaddaha Dalka, Khidmada Diiwangelinta iyo Midda Sanadlaha ee laga rabo Qareennada.
“Maanta waa maalin taariikhi ah, maadama Wasaaradda Maaliyaddu, oo si dhaw ula shaqaynaysa hoggaanka Hay’addaha Garsoorka, wada-tashina la yeelatay Ururka Qareennada, ay soo saartay Xeer-nidaamiyaha Ajuurada Maxkamaddaha, iyo Khidmada Diiwangelinta iyo Midda Sanadlaha ah ee Qareennada”. Ayuu yiri Wasiirka Maaliyadda Dr. Cilmi Maxamed Nuur.
Xeer-nidaamiyahaan ayaa waxa uu si cad u qeexayaa khidmaddaha lagu dabaqaayo adeegyada kala duwan ay bixiyaan Maxkamadaha, cidda mas’uul ka ka ah ururinta khidmadahaan iyo sidoo kale koontooyinka bangiyada ee lagu shubayo.
Wasiirka Maaliyadda ayaa sheegay in bixinta khidmadahaan ay muwaadiniinta u sahli doonta in ay u furtaan galal,dacwadaha ay qabaan, walibana ay fursad u helaan in dacwadahoodu ay dhagaystaan saraakiisha garsoor ee awoodda u leh.
Wasiirka Maaliyadda ayaa sidoo kale sheegay in si loo dhiirigaliyo Xirfadda Qareennimada ay ku soo biiraan xirfadlayaan qareenno ah oo cusub, hoos loo dhigay khidmada diiwangelinta ee laga rabo qareennada cusub, iyadoo laga dhignay $ 300 dollar,halka markii hore ay ka ahayd $500 dollar.
Wasaaradda Maaliyadda Soomaaliya ayaa sheegtay in la hubin doono in Xeer-nidaamiyuhu u shaqeeyo hab wax ku ool ah, walibana ay Waaxda Canshuuraha Berriga ee Wasaaradda ayaa si joogto ah u korjoogteeyn doonta qaabka loo ururiraanayo khidmadaha la xeeriyay, iyadoo warbixin bille ah loo soo gudbin doono Wasiirka Maaliyadda.
![](https://scontent.fmgq1-2.fna.fbcdn.net/v/t39.30808-6/336523172_236193188778782_4500850259963365709_n.jpg?stp=cp6_dst-jpg_p526x395&_nc_cat=103&ccb=1-7&_nc_sid=8bfeb9&_nc_ohc=Gqbc5jbKc0MAX-3gs3s&_nc_ht=scontent.fmgq1-2.fna&oh=00_AfALfwsh33TvYOIQnFHS83NKdAg4Eaq-eYE2xpxfKlI58w&oe=641BF496)
![](https://scontent.fmgq1-2.fna.fbcdn.net/v/t39.30808-6/336545366_913799513294016_3034427954303686444_n.jpg?stp=cp6_dst-jpg_p526x395&_nc_cat=101&ccb=1-7&_nc_sid=8bfeb9&_nc_ohc=KIyij5cSm7QAX9Z3z5j&_nc_ht=scontent.fmgq1-2.fna&oh=00_AfBe2DpP1l-kxGfLvnbcZvzXS5aJRWht3sJKysbW7G6WmQ&oe=641B23C0)
![](https://scontent.fmgq1-2.fna.fbcdn.net/v/t39.30808-6/336485946_1524717124722761_6483675216693845791_n.jpg?stp=cp6_dst-jpg_p403x403&_nc_cat=104&ccb=1-7&_nc_sid=8bfeb9&_nc_ohc=GRG8_ltrDWcAX__fo-_&_nc_ht=scontent.fmgq1-2.fna&oh=00_AfANwNh6yG872T0k_CRC6gy2H27xbZnkM3Nrjtlo8qMzjw&oe=641CB3D0)
![](https://scontent.fmgq1-2.fna.fbcdn.net/v/t39.30808-6/336491263_905191487395473_4570338399208633615_n.jpg?stp=cp6_dst-jpg_s600x600&_nc_cat=107&ccb=1-7&_nc_sid=8bfeb9&_nc_ohc=o4EnGUZW3VIAX-g12V2&_nc_ht=scontent.fmgq1-2.fna&oh=00_AfDuUVOupbT_lUrqtFoBeDJBN89C8vLOECjQXBL1oCgosQ&oe=641B254E)
Goobjoog News