Wasaaradda Arrimaha Dibadda oo Beenisay in ay u yeertay Safiirkeedii dalka Kenya

Wasaaradda Arrimaha Dibadda iyo Iskaashiga Caalamiga ah ee Soomaaliya ayaa si rasmi ah u beenisay warar baraha bulshada lagu faafiyey oo sheegayay in dowladda Soomaaliya ay u yeertay Safiirkeeda u fadhiya dalka Kenya si uu uga soo warbixiyo xaalado la xiriira xiriirka labada dal.

Qoraal rasmi ah oo ka soo baxay Wasaaradda ayaa lagu caddeeyey in warkaasi aanu sal iyo raad lahayn, isla markaana uu yahay war been abuur ah.

Wasaaradda waxay hoosta ka xariiqday in xiriirka diblomaasiyadeed ee u dhexeeya Soomaaliya iyo Kenya uu yahay mid caadi ah oo aan wax isbeddel ah lagu sameynin.

Dowladda Soomaaliya waxay ugu baaqday warbaahinta iyo shacabka Soomaaliyeed in ay iska hubiyaan wararka ay la wadaagayaan bulshada si looga fogaado faafinta xog aan rasmi ahayn.

Waxaa xusid mudan in xiriirka diblomaasiyadeed ee Soomaaliya iyo Kenya uu soo maray marxalado kala duwan, balse haatan labada dal ay leeyihiin wadashaqeyn dhanka diblomaasiyadda ah.