Maamulka Goobjoog media group oo si ad u cambaareeyay xarigga wariye Rowda Xasan Taakile

Maamulka warbaahinta Goobjoog ayaa si adag u cambaareeyay xarigga iyo afduubka ay ciidanka dawladda Soomaaliya u geysteen wariye Rowdo Xasan Taakile oo ka tirsan hawl-wadeennada Goobjoog.

War qoraala ah ka soo baxay maamulka sare ee Goobjoog ayaa lagu yiri “Maamulka Goobjoog Media Group wuxuu si adag oo aan tanaasul lahayn u cambaareynayaa afduubka iyo xarigga sharcidarrada ah ee ay ciidamada dawladdu xalay kula kaceen Weriye Rowdo Xasan Taakilo, oo ka tirsan hawlwadeennada warbaahinta Goobjoog, xilli ay u sii hoyanaysay gurigeeda.

Xariggan wuxuu muujinayaa cabburinta sii xoogaysanaysa ee saxaafadda iyo xorriyad-ka-qaadista wariyaasha wardoonka ah ee ka hawlgala magaalada Muqdisho.

Waxaan ugu baaqaynaa Dawladda Federaalka ah ee Soomaaliya iyo dhammaan laamaha amniga inay si degdeg ah oo shuruud la’aan ah u sii daayaan wariye Rowdo Xasan Taakilo, lana ixtiraamo hufnaanta shaqada warbaahinta madaxa bannaan iyo shuruucda dalka”.

Xarigga sharci-darrada ee wariye Rowdo Xasan Taakilo ayaa qeyb ka ah cadaadis baahsan oo warbaahintu muddooyinkii dambe ay kala kulmaysay ciidanka Dawladda, ayadoo wariyaasha lagula kacayo xarig iyo afduub joogto ah.