Wasaaradda Caafimaadka Kenya ayaa xaqiijisay kiiskii ugu horreeyay ee cudurka Mpox (Monkeypox) ee laga diiwaangeliyo dalka sanadkan, iyadoo bukaanka laga helay degmada Embu County.
Warkan ayaa soo baxay xilli dowladda Kenya ay sare u qaadayso dadaallada looga hortagayo suurtagalnimada in cudurka Ebola uu dalka soo galo.
Mas’uuliyiinta caafimaadka ayaa sheegay in baaritaanno lagu sameeyay bukaanka ay xaqiijiyeen inuu qabo Mpox, waxaana durba la bilaabay dabagalka dadka la xiriiray si looga hortago faafitaanka cudurka.
Dowladda ayaa sidoo kale xoojisay kormeerka caafimaad ee goobaha laga soo galo dalka, gaar ahaan xuduudaha iyo garoomada diyaaradaha.
Soo bixitaanka cudurka Mpox ayaa kusoo aadaya xilli Kenya ay heegan ugu jirto ka hortagga Ebola, ka dib markii dalalka deriska ah, gaar ahaan Uganda iyo Democratic Republic of the Congo, ay la tacaalayaan xaalado la xiriira cudurrada faafa.
Wasaaradda Caafimaadka ayaa shacabka ugu baaqday inay ilaaliyaan nadaafadda, isla markaana si degdeg ah ugu wargeliyaan xarumaha caafimaadka haddii ay arkaan calaamadaha cudurka Mpox, kuwaas oo ay ka mid yihiin qandho, madax xanuun, daal iyo finan kasoo baxa jirka.
Khubarada caafimaadka ayaa sheegaya in inkastoo Mpox iyo Ebola ay yihiin cudurro kala duwan, haddana isku mar la tacaalidda laba khatarood oo caafimaad ay culays dheeraad ah saari karto nidaamka caafimaadka.