Xiisadda militari ee u dhexeysa Iiraan iyo Mareykanka ayaa si weyn uga sii dartay, kaddib markii ciidamada Iiraan ay sheegeen inay weerar ballaaran oo diyaaradaha aan duuliyaha lahayn ah ku qaadeen saldhigga Sheikh Isa Air Base ee dalka Baxrayn, oo ay ku sugan yihiin ama adeegsadaan ciidamada Mareykanka.
Weerarka ayaa yimid saacado kaddib markii Mareykanku uu qaaday duqeymo cusub oo ka dhan ah bartilmaameedyo militari oo Iiraan ku yaalla.
Militariga Iiraan ayaa sheegay in weerarka, oo ay ku tilmaameen qayb ka mid ah hawlgallo aargoosi ah, lagu bartilmaameedsaday xarumaha radar-ka iyo meelaha ay isugu yimaadaan ciidamada Mareykanka ee saldhigga Sheekh Ciise.
Warbaahinta Iran waxay sheegtay in weerarka loo adeegsaday diyaarado aan duuliye lahayn oo weerar ah, Baxrayn dhankeeda waxay sheegtay in nidaamyadeeda difaaca cirka ay qabteen oo burburiyeen diyaaradaha aan duuliyaha lahayn ee Iiraan, iyadoo mas’uuliyiintu dadka ugu baaqeen inay isdejiyaan oo ay raacaan tilmaamaha amniga.
Weerarka Baxrayn wuxuu qayb ka yahay is-weydaarsi weerarro ah oo gobolka ka socda, iyadoo Iiraan ay sheegtay inay sidoo kale weerarro gantaallo iyo diyaarado aan duuliye lahayn ku qaaday goobo ay ku sugan yihiin ciidamada Mareykanka ee Jordan iyo Ciraaq, halka Jordan ay sheegtay inay soo ridday 10 ka mid ah 13 gantaal oo Iran ay ku soo tuurtay hawadeeda.
Saddexda kale waxay ku dhaceen goobo ka baxsan xarumaha dadka ku badan yihiin, sida ay sheegeen ciidamada Jordan.
Dhanka Mareykanka, Taliska Dhexe ee Mareykanka, CENTCOM, ayaa sheegay inuu dhammeystiray duqeymo cusub oo lagu qaaday bartilmaameedyo la xiriira Ilaalada Kacaanka Islaamiga ah ee Iiraan.
Bartilmaameedyada uu Mareykanku sheegay waxaa ka mid ahaa nidaamyada difaaca cirka, radarro, qalab iyo xarumo badeed, awoodaha miino-dhigista iyo xarumaha isgaarsiinta.
Is-weydaarsiga cusub ayaa kusoo beegmay xilli xiisadda Marinka Hormuz ay sii xoogeysaneyso, iyadoo Marinkani uu yahay waddo muhiim u ah maraakiibta shidaalka iyo ganacsiga caalamiga ah, waxaana cabsi laga qabaa in dagaalka sii fidaya uu carqaladeeyo isu-socodka maraakiibta iyo sahayda tamarta.
Xiisadda ayaa durba kor u riixday qiimaha shidaalka, iyadoo Brent crude uu Arbacadii gaaray in ka badan $95 halkii foosto.