Boqolaal qof oo reer Tigree ah, oo ay ku jiraan dagaalyahanno dhaawac ah, ayaa u qaxay gudaha Suudaan kadib dagaallo culus oo ka dhacay deegaanka Shererina ee waqooyiga Itoobiya, halkaas oo ay isku farasaareen ciidamada dowladda federaalka Itoobiya iyo dagaalyahannada Jabhadda Xoreynta Shacabka Tigrey (TPLF).
Dagaallada oo billowday subaxnimadii Sabtida ayaa la sheegay in lagu adeegsaday madaafiic culus iyo diyaaradaha aan duuliyaha lahayn (drones), taasoo sare u qaaday walaaca laga qabo in uu burburo heshiiskii nabadeed ee la gaaray sannadkii 2022, kaas oo soo afjaray dagaalkii dhiigga badnaa ee ka dhacay gobolka Tigrey.
TPLF ayaa dowladda Itoobiya ku eedeysay inay bilowday weerarka islamarkaana ay qaaday duullaan ballaaran oo dhinaca dhulka ah, halka dowladda federaalka iyo ciidamada Tigrey ay muddo bilo ah isku horfadhiyeen xadka waqooyiga gobolka, iyagoo labada dhinacba midba kan kale ku eedeynaya inuu doonayo inuu huriyo dagaal cusub.
Warbaahinta gudaha Suudaan ayaa sheegtay in qaraxyo iyo rasaas culus laga maqlayay xadka labada dal, iyadoo qaar ka mid ah madaafiicda ama weerarrada diyaaradaha aan duuliyaha lahayn ay ku dhaceen xeryo ay ku nool yihiin qaxootiga.
Hay’adda Qaramada Midoobay u qaabilsan qaxootiga (UNHCR) ayaa muujisay walaac xooggan oo ku saabsan sii kordhaya xiisadda ka jirta xadka Itoobiya iyo Suudaan, maadaama ay halis gelin karto badbaadada kumannaan qaxooti ah.
Dagaalkan cusub ayaa dib u soo nooleeyay cabsi laga qabo in Itoobiya ay markale gasho dagaal sokeeye oo baaxad leh, wax ka yar afar sano kadib dhammaadkii dagaalkii Tigrey oo lagu qiyaasay inuu sababay dhimashada ugu yaraan 600,000 oo qof, sida uu hore u sheegay Midowga Afrika, isla markaana malaayiin qof ku khasbay inay barakacaan.