Wasiirka Beeraha iyo Waraabka Xukuumadda Federaalka Soomaaliya, Xildhibaan Maxamed Cabdi Xayir (Maareeye), Wasiiru Dowlaha Wasaaradda Gaashaandhigga Cumar Cali Cabdi iyo Taliyaha Ciidanka Dhulka, Sareeye Guuto Sahal Cabdullaahi Cumar, ayaa kulan la yeeshay qaar ka mid ah beeraleyda gobolka Shabeellaha Hoose.
Beeraleyda ayaa mas’uuliyiinta u gudbiyay cabashooyin ku saabsan dhibaatooyin ay sheegeen in kooxda Al-Shabaab ay ku hayso deegaannadooda, iyo sidoo kale waxyeellooyin ka dhashay qaar ka mid ah howlgalladii amni ee dhowaan ka dhacay gobolka.
Mas’uuliyiinta ayaa dhageystay cabashooyinka beeraleyda, iyagoo ballanqaaday in arrimaha la diiwaangelin doono lana gaarsiin doono hay’adaha ay khuseyso si loo baaro. Waxay sidoo kale carrabka ku adkeeyeen muhiimadda ay leedahay ilaalinta shacabka, hantidooda iyo wax-soo-saarka beeraha inta ay socdaan howlgallada amniga.