Wasiirka Arrimaha Dibadda iyo Iskaashiga Caalamiga ah ee Soomaaliya, Mudane Cabdisalaam Cali, ayaa magaalada New York kulan laba geesood ah kula yeeshay Wasiirka Dowladda ah, Wasiirka Arrimaha Dibadda, Jaaliyadda Qaranka ee Dibadda iyo Arrimaha Afrika ee Jamhuuriyadda Dimuqraadiga ah ee Aljeeriya, Axmed Attaf.
Kulanka ayaa ka dhacay xilli labada wasiir ay ka qeybgalayeen fadhiyada Golaha Guud ee Qaramada Midoobay, iyadoo diiradda lagu saaray xoojinta xiriirka iyo iskaashiga ka dhexeeya Soomaaliya iyo Aljeeriya.
Labada mas’uul ayaa ka wada hadlay sidii loo ballaarin lahaa iskaashiga labada dal iyo fursadaha lagu horumarin karo xiriirkooda dhinacyada kala duwan. Waxay sidoo kale isku raaceen in la xoojiyo isku-duwidda iyo wada-shaqeynta Soomaaliya iyo Aljeeriya, gaar ahaan arrimaha khuseeya danaha labada dal iyo iskaashiga heer caalami iyo mid goboleed.
Kulanka ayaa qeyb ka ah dadaallada diblomaasiyadeed ee Soomaaliya ay ka waddo dhinacyada kulamada Golaha Guud ee Qaramada Midoobay, kuwaas oo fursad u siinaya dowladda Soomaaliya inay xoojiso xiriirrada ay la leedahay dowladaha kala duwan iyo hay’adaha caalamiga ah.
Aljeeriya ayaa ka mid ah dalalka muhiimka ah ee qaaradda Afrika iyo dunida Carabta, iyadoo labada dal ay wadaagaan xiriir diblomaasiyadeed iyo iskaashi ku saleysan danaha labada dhinac.
Wasaaradda Arrimaha Dibadda iyo Iskaashiga Caalamiga ah ee Soomaaliya ayaa sheegtay in kulanka New York uu muujinayo muhiimadda ay labada dhinac siinayaan horumarinta xiriirkooda, iyadoo la filayo in wada-shaqeynta labada dowladood ay sii ballaarato.
Kulanka ayaa kusoo beegmaya xilli Soomaaliya ay dadaal ugu jirto xoojinta xiriirrada diblomaasiyadeed ee ay la leedahay dalalka Afrika, Carabta iyo beesha caalamka, iyadoo sidoo kale xoogga saareysa iskaashi ku saabsan arrimaha siyaasadda, amniga, horumarka iyo danaha wadajirka ah.