Guddoomiyaha Guddiga Midowga Afrika, Maxamuud Cali Yuusuf, ayaa muujiyay murugo xooggan oo ku aaddan geerida 109 qof oo tahriibayaal ah, oo ay carruur ku jiraan, kaddib markii doon ay la socdeen ay kula degtay xeebaha dalka Jabuuti.
Guddoomiyaha ayaa tacsi u diray qoysaska iyo ehellada dadkii ku naf waayay shilka, isagoo sidoo kale muujiyay garab istaaggiisa dhammaan dadka ay musiibadani saamaysay.
Bayaan uu soo saaray Midowga Afrika ayuu Maxamuud Cali Yuusuf ku adkeeyay baahida loo qabo in la xoojiyo iskaashiga dalalka gobolka iyo beesha caalamka, si wax looga qabto sababaha asaasiga ah ee dadka ku riixa tahriibka sharci-darrada ah.
Waxa uu sidoo kale ku baaqay in la xoojiyo dadaallada lagula dagaallamayo tahriibinta dadka iyo ka ganacsiga bani’aadamka, kuwaas oo khatar weyn ku haya nolosha dadka safarrada halista ah u gala raadinta nolol ka wanaagsan tan ay ku nool yihiin.
Guddoomiyaha ayaa carrabka ku adkeeyay muhiimadda ay leedahay in la helo waddooyin ammaan ah, nidaamsan oo sharci ah oo ay dadku u mari karaan socdaalka, si loo yareeyo khataraha ay wajahayaan dadka u tahriibaya dalal kale.
Musiibadan ayaa mar kale iftiiminaysa khatarta ay dadka tahriibayaasha ahi kala kulmaan safarrada badda, gaar ahaan marka ay raacaan doonyo aan u qalabaysnayn qaadista dad badan, taas oo kordhisa halista inay ku degaan ama ay ku dhacaan shilal dhimasho sababa.
Maxamuud Cali Yuusuf ayaa sidoo kale dib u xaqiijiyay sida Midowga Afrika uga go’an tahay inuu la shaqeeyo dowladaha xubnaha ka ah ururka iyo hay’adaha ay wada shaqeeyaan, si loo ilaaliyo nolosha iyo karaamada muhaajiriinta, gaar ahaan dadka nugul sida carruurta.
Waxa uu tilmaamay in loo baahan yahay dadaallo wadajir ah oo lagu hortagayo musiibooyinka noocan oo kale ah, iyadoo diiradda la saarayo ilaalinta dadka safarrada tahriibka ah gala, la dagaallanka shabakadaha dadka tahriibiya iyo wax ka qabashada duruufaha dhaqaale iyo bulsho ee ku khasba dad badan inay galaan safarro halis ah.
Bayaanka Midowga Afrika ayaa ku soo beegmaya xilli ay sii kordhayaan walaacyada laga qabo khasaaraha nafeed ee ka dhasha tahriibka, gaar ahaan marinnada badda ee Geeska Afrika, halkaas oo dad badan ay isku dayaan inay ku gaaraan dalal kale iyagoo raadinaya shaqo, amni iyo nolol ka wanaagsan.
Midowga Afrika ayaa ku baaqay in dowladaha gobolka iyo beesha caalamku ay xoojiyaan iskaashiga iyo tallaabooyinka wax ku oolka ah ee lagu badbaadinayo nolosha muhaajiriinta, laguna xaqiijinayo in dadka doonaya inay dalal kale u safraan ay helaan waddooyin ammaan ah oo sharci ah.